Ерөө нутаг алдартай тариаланчдаараа бахархахаас аргагүй нутаг. Ууган баатраас эхлээд олон баатруудыг төрүүүлсэн газар. Тийм нутгийн нүүр царай болж явна гэдэг амаргүй бизээ. Харин ингэж чадсан хүн бол Гавъяат механикжуулагч С.Ганболд юм. Тэр 1970-аад оны тариаланч. САА нь түүнд итгэл өгч салааны ахлагчаар ажиллуулжээ. Тэр салаагаа чадварлаг удирдаж байлаа. 1984-1990 онуудад 13500-15750 цн ургац хураан авсан амжилтаар улсын ургацын аваргаар 5 удаа шалгарчээ. Салааных нь ажил ч даргаа дагаад өөдрөг байв. Тэр салаагаа эвсэг , нөхөрсөг, нэгнийгээ гэсэн уур амьсгалтай болоход нь биеэрээ үлгэрлэн дагуулсан гэж тариаланчид өдгөө бахдан дурсаж байна. Ерөөчүүд түүнд итгэлээ олон удаа өгчээ. БНМАУ-ын АИХ-ын депутатаар сонгож төрөө төлөөлүүлж байв. Газар тариалан задарч хувийн олон жижиг хэсэг болоход ч тэр үндсэн үйлдвэрлэлээ алдагдуулалгүйгээр авч үлдэж чаджээ. Бүх газар ургац алдаж, тариалалт багасаж байхад тэр тогтвортой ажиллаж, хүнд бэрхийг туулан нойр хоолгүй зүтгэж байв. Үүний үр дүн ч гарч тэр 1 га-гаас 14-16 цн үр тариа жил бүр хураан авч чаджээ. Түүний авч үлдсэн “Их Шинэстэй” ХХК өдгөө ч Ерөөгийн тариалангийн түүчээ болж явна. Амьдралынхаа хэдэн арван он жилүүдийг газартай харьцаж өнгөрүүлсэн тэрээр нутгийнхаа олны итгэлийг хүлээж сумынхаа Засаг даргаар 2 удаа сонгогдсон юм. Хэзээний газарт сэтгэлээ өгсөн хүний хувьд тэр 2009 онд чөлөө гуйж өөрийн эрхэлж байсан газар тариалангийн компанидаа захиралаар эргэж очсон юм. “Хөдөлмөрийн гавъяаны улаан тугийн одон”,”Алтан гадас “одон, “Хөдөлмөрийн хүндэт медалиар энгэрээ мялааж олноо хүндлэгдсэн алдартанд Монгол улсын гавъяат механикжуулагч цол хүртээжээ.
Н.Нямжаргал дарга Ерөө САА-д домог мэт яригдаж үлдсэн хүн. Баянхонгор аймгийн Жаргалант суманд 1923 онд төржээ. Цэргийн алба хааж ирсэнийхээ дараа эвлэлийн үүрийн дарга, аймгийн намын хорооны зааварлагч зэрэг ажлууд хийж байгад Намын дээд сургуульд суралцжээ. Дараа нь Алта-Ата хотод САА-н удирдах ажилтны дээд курс төгсгөжээ. Дээд курс төгсөж ирсэнийхээ дараа Алтанбулаг САА-н даргаар томилогдож Сэлэнгэ нутагт ажлын гараагаа тавьжээ. 1963 онд түүнийг Ерөө САА-н даргаар томилжээ. Ийнхүү тэр “Ерөөгийн Нямжаргал” болжээ. Ерөө САА атрын ууган аж ахуй учир очиж байгаа хүнд хариуцлага бусдаас илүү гэдгийг мэдрүүлдэг газар байв. Улс даяар алдар суу нь түгсэн, олон баатрууд төрүүлсэн аж ахуйн даргаар ирнэ гэдэг амаргүй байсан нь мэдээж. Гэвч Нямжаргал дарга аж ахуйг удирдах асар их туршлага бий болгож, аж ахуйг шинэ үеийн байдалд зохицуулан удирдах, хөгжүүлэх, нийгмийн асуудлын шийдвэрлэх, хөгжлийн шинэ гарц руу хөтлөх арга ухааныг хослуулан ажиллаж чадсан хүн байв. Дээр нь тэр эдийн засгийн талаар өндөр мэдлэгтэй, төлөвлөгөөтэйгээр аж ахуйгаа хөгжүүлэх талаар хэтийн бодолтой ажилласан хүн. Аливааг арга эвийг нь олж хийж чаддаг, олж долохын ухаан сайтай дарга байсан учир аймаг алгасч аливааг бүтээдэг, хөрш буриад улстай байнгын харьцаатай байж ихийг амжуулж чаддаг байлаа. Нямжаргал даргын үед Ерөө САА хуучин бүхнээ гээж чадсан бөгөөд шинэ аж ахуйг газар тариалан, эрчимжсэн мал аж ахуйг хослуулан хөгжүүлсэн газар болгож чадсан юм. Тиймээс нарийн нарийвтар ноост “Ерөө” хонь, “Ерөөгийн” гэж алдаршсан урт нуруутай ягаан гахайг тэр бий болгож үлдээсэн юм. Хамт ажилласан хүмүүстээ итгэл өгч бие даалгаж чаддаг, аливаа ажлын дараа заавал шалгаж зааварладаг, бас дүгнэж урамшуулдаг хүн байлаа гэж өдгөө түүнтэй хамт ажиллаж байсан нөхөд нь дурсаж байна. Олон түмний санал бодлыг их сонсож гаргах гэж байгаа шийдвэртээ заавал тусгаж хэрэгжүүлдэг байсан нь их онцлог байжээ. Аливаа хөрөнгийг замбараагүй зарахыг шүүмжилдэг, илүү зардал гаргахаас зайлсхийхийг нөхөддөө сануулдаг байсан нь олон хүнийг эдийн засгач, арвич хямгач болгоход тусалжээ.
Төр, засаг түүний хөдөлмөрийг үнэлж 1973 онд “БНМАУ-ын гавъяат эдийн засагч” цол хүртээжээ. Тэр 1983 онд АИХ-ын депутараар сонгогдож байлаа.
Ерөө САА-н тракторч-комбайнч М.Алтангэрэл 1974 онд БНМАУ-ын хөдөлмөрийн баатар цол хүртжээ. Тэр 1961 онд “СК-3” комбайн авч ажиллажээ. 1966-1972 онуудад комбайнаар 4890 га хурааж, 7 жилд 20 жилийн ажил хийжээ. 5-р таван жилийн эхний 3 жилд 13 жил 6 сарын ажил хийсэн амжилтууд нь түүнд баатарын алтан таван хошуу зүүх алдар хүндийг авчирчээ. Баатрууд маань бүгд өөрийн аргатай. Тэр цаг хожих олон аргыг өөртөө мөрдөж ажиллажээ.
Алтангэрэл баатарын амжилтын гол үндэс нь цагийн тооцоо, түүнийг хэрэгжүүлэх сахилгыг чанд сахиснаар илэрдэг. Тэр 1980-аад оны дундуур бригадын даргаар ажиллаж 1987 онд ахалсан бригад нь аймгийн аварга тариаланч хамт олон болж байжээ.
Дундговь аймгийн Дэлгэрхангай сумын уугуул. Ерөөгийн САА-н тракторч-комбайнч.
1961 онд БНМАУ-ын хөдөлмөрийн баатар цол хүртсэн ууган атарчин.1960 онд ХАА-н тэргүүний тракторч, комбайнчдын бүсийн уулзалтад шалгаран оролцсон юм. Энэ уулзалт дээр хөдөлмөрийн баатрын болзол хангахаас нааш тариан талбараас буухгүй гэж амлаад хаврын тариалалтаар 2121 га явж хоёр мянгач тракторын нормыг хангаад амласныхаа анхны босгыг давжээ. Баттөр намар нь “СК-3” комбайнаар 526 га талбайгаас 9994 цн ургац авч, 1414л шатахуун хэмнэж БНМАУ-ын хөдөлмөрийн баатрын болзолыг 13 хоногт биелүүлэн өмнө нь хөдөө аж ахуйн хуудсанд гараагүй аваргын агуу шинэ норм тогтоосон юм
Анхны атарчин, ууган тариаланч түүнийг 1960 онд БНМАУ-ын хөдөлмөрийн баатар цолоор шагнажээ.
Ерөөгийн САА-н тракторч-комбайнч Г.Лувсанчимид “ДТ-54”, “С-80” трактор, “С-4”, “С-6”, СК-3” комбайнууд барьж атар газарт өөрийн мөрөө үлдээсэн алдарт тариаланч юм. Дээрх техникүүдийг барьж жил бүрийн төлөвлөгөөт зорилтыг тогтмол 130-140 хувь биелүүлж байлаа. 1954 оны хавар 1080 га-д үрэлгээ хийж, намар нь “СК-3” комбайнаар ажлын 16 хоногт 524 га-гийн тариа хадаж, 8425 цн ургац авч энэ комбайны дээд амжилтыг үзүүлж байсан байна. Ийнхүү ажиллахдаа 2225л шатахуун хэмнэж чадсан байна.
Лувсанчимид баатар эдүгээтэй харьцуулахад бүтээмж багатай, хаалт хамгаалалтгүй техникээр өндөр амжилт үзүүлж байсан цөөхөн тариаланчдын нэг юм.
Хөвсгөл аймгийн Эрдэнэбулган сумын харъяат. 1958 онд БНМАУ-ын хөдөлмөрийн баатар цолоор шагнагджээ.
1953 оноос хойш Ерөө САА-н тракторч-комбайнчаар ажиллажээ.1953-1957 онд “ДТ-54” трактораар зөөлөнд шилжүүлсэнээр 1700га хагалжээ. 1957 онд 500га атар хагалж 10 хоногт 900га үр суулгаж “С-6” комбайнаар 150 га-гийн ургац хурааж байсан алдарт тариаланч. 1958 онд БНМАУ-ын Хөдөлмөрийн баатар хэмээх эрхэм дээд шагналыг газар тариалангийнханаас хамгийн түрүүнд хүртсэн агуу хүн юм. Ууган баатар маань амжилтад хүрсэн 12 аргаа ийнхүү нэрлэлээ.
1.”ДТ-75” тракторын 4 далбаат сэнсэнд 2-ыг нэмж 6 болгосноор моторын халалтыг багасган, сул зогсолтыг арилган хагалах ёстой нормт га-г 9-21 га-гаар нэмэгдүүлжээ.
2.Үрэлгээ хийхдээ үрлүүр дээр сууж яваа хүмүүс ,үр зөөдөг жолооч нартай нарийн хэлцэж цаг хожсоноор өдрийн үрлэх нормыг 7-37 га-гаар нэмэгдүүлжээ.
3.Үрэлгээний үед агрегатын тоог 4-д хүргэж тариалах өргөний хэмжээг нэмэгдүүлжээ
4.Агрегатуудын дугуйг нэгнээсээ 20см-ийн дотор байхаар тохируулж мөр хоорондын гологдол гаргадаггүй болжээ.
5.Тариалах мөрийн гүний тохируулгыг нарийн хийж сурчээ.
6.Тосолгоог өдөр бүр ажил дууссаны дараа хийж, агрегат дээр яваа хүнд тослох дугуйг өдөр бүр зааж хийлгэж сургажээ.
7.Шанг тэгш татаж, хагалгааг эхлээд өрж шангийн эцэст хүрээд хумьж хагалдаг байна. Эндээс шатахуун хэмнэж сул явалтыг багасгаж чаджээ.
8.”ДТ-54” тракторын 2, 3-р араагаар л ажилладаг. Бусад араагаар явах нь хөрсний элдэншүүлэг, гүн үр суулгахад алдаа гарна гэж үздэг байна.
9.Анжисны тохируулгы сайн хийж сурчээ.
10.Ямарч үед эр, эм эрэг, 14, 20-ийн боолт ,цан, цангийн таглаа авч явна. Шаардлагатай үед цаг алдахгүй гэж үздэг байна.
11.Борной үрэлгээний үед агаар цэвэрлэгчийг өдөр бүр цэвэрлэдэг. Энэ нь гильз, поршингийн элэгдлийг багасгадаг байна.
12.Түлшний аппаратыг байнга цэвэрлэж хэвшжээ.
Энэ 12 зүйлийг мөрдлөг болгож ажилласнаар баатар болоод зогсоогүй дараагийн олон жилүүдэд тогтвортой амжилт гаргах нөхцөл бүрдсэн байна.Н.Бямбацогт гуай газар тариалангийн ууган баатар гэдгээрээ түүхийн хойморт алтан үсгээр бичигдэх алдар хүндийн эзэн болж чадсан хүн. Араасаа олон арван баатруудыг дагуулсан булган сүүлтэй баатар ч гэж болно..
СЭЛЭНГЭ АЙМАГ ЕРӨӨ СУМЫН БУГАНТ ТОСГОНЫ ЕРӨНХИЙ
БОЛОВСРОЛЫН СУРГУУЛИЙН ТҮҮХЭН ХӨГЖИЛ, ТОВЧ ТАНИЛЦУУЛГА
Нэг. Бага сургуулийн үе \ 1959 – 1965 он \
1927 онд Богд хан уулын аймгийн Ерөө голын хошууны буюу одоогийн Ерөө сумын анхны бага сургууль байгуулагдсан. Тус сургууль нь 1927-1957 оны хавар дуустал 30 жил хичээллэсэн бөгөөд 1957-1958 оны үед Карников тосгон татан буугдаж сумын төв болох Тавинд нүүж суурьшсан.
СНЗ-ийн 1959 оны 1 дүгээр сарын 13-ны өдрийн 04 тоот тогтоолоор Ерөө содон заводын анхны бага сургууль байгуулагдаж соёлын үрийг тарьж эхэлсэн. 1958 онд ашиглалтагд орсон 3 өрөө дүнзэн байшинд 4 анги 37 сурагч, захирал эрхлэгчээр Жигжидсүрэнгийн Товууч, багш Наваандлоржийн Жамсран, комендант Гомбожавын Дэмбэрэл, манаач Содномын Загд, цэвэрлэгч Нанжид, галч Дорждулам нарын бүрэлдэхүүнтэйгээр 1959 оны 9 дүгээр сарын 1-ний өдөр анхны хичээлээ эхэлсэн түүхтэй.
1959-1960 оны хичээлийн жилд 1-р ангид орсон анхны сурагчид:
Хоёр. 7 жилийн сургууль болон өргөжсөн нь \ 1965 – 1972 он \
1965-1966 оны хичээлийн жилээс БНМАУ-ын СНЗ-ийн 1965 оны 8-р сарын 9-ны 336 дугаар тогтоол, Сэлэнгэ аймгийн Гэгээрлийн хэлтсийн даргын 1965 оны 8-р сарын 18-ны 100 тоот тушаалаар 7 жилийн сургууль болон өргөжиж Захирал Н. Жамсран, багш Ц. Гомбосүрэн, Ж. Бурмаа, Г. Эрдэнэтуяа, Татъяана Петровна, коментант Цэрэндулам, цэвэрлэгч Цэнд, галч Дашпунцаг нарын бүрэлдэхүүнтэй 5 анги 106 сурагчтай анхны хичээлээ эхэлсэн. 7 жилийн бүтэцтэй 7 жилийн хугацаанд шинээр Л. Цэнд, Баасанхүү, С. Чанцал, Н. Жигмэддорж, Ш. Жамъяншарав, Цэлмэг, А. Ганзориг, Нацаг, Бааюу, Доржсүрэн, Батбуян, Халтар, Г. Энхтуяа нарын бага анги, монгол хэл, орос хэл, математик, биеийн тамирын мэргэжлийн багш нар ирж ажиллаж, мэргэжилтэй боловсон хүчнээр хангагдаж, сурган хүмүүжүүлэх их үйлсэд хамтран зүтгэж байлаа.
Энэ хугацаанд давхардаагүй тоогоор 20 багш, 314 сурагчдад эрдэм ном зааж зааж, 7-р ангийн 4 удаагийн төгсөлтөөр 56 хүүхэд төгссөн байна. Төгсөгчдөөс Өндөрийн Оюунбаатар, Шоотуузын Чулуунбаатар, Шоотуузын Хасбаатар нар сургуулиа оны дүнтэй төгсжээ.
1965-1970 он буюу IV таван жилийн хугацаанд 618 сурагч суралцаж, сурлагын амжилт 97.7%, чанар 46.9% дүгнэгдэж, Сэлэнгэ аймгийн 22 сургуулиас 2-р байр, 7жилийн сургуулиудаас Тэргүүн байрт шалгарч байсан нь манай сургуулийн багш, сурагчдын амжилттай ажиллаж, суралцаж байсны баталгаа юм.
Гурав. 8 жилийн буюу бүрэн бус дунд сургууль болон өргөжсөн он жилүүд
\ 1972 – 1985 он \
Манай нам засгаас бүх нийтийг 8 жилийн боловсролтой болгох зорилт тавигдаж БНМАУ-ын СНЗ-ийн 101 дүгээр тогтоол, Сэлэнгэ аймгийн Боловсролын хэлтсийн даргын 1971 оны 8-р сарын 23-ны өдрийн 78 тоот тушаалаар Бугант хорооны дунд сургуультай нийлж нэг сургууль болон хичээллэв. 1971 оны намар МБАА Бугантад шилжин ирж хоёр сургууль нэгдэн П хэлбэрийн шинэ байранд 8 анги анги, 12 бүлэгт 296 сурагч суралцаж байлаа. Сургуулийн захирал, хичээлийн эрхлэгчээр Н. Жамсран ажиллаж байсан бөгөөд шинээр Сосорбарам, Клара, Цэрэннадмид, Бүжинлхам, Г. Эрдэнэчимэг нар ажилласан.
8 жилийн бүтцээр хичээллэсэн 14 жилийн хугацаанд нийт 215 бүлэгт 6197 сурагч суралцаж, 8-р ангийн 18 бүлгийг 545 сурагч төгсөж бүрэн бус дунд боловсролын гэрчилгээ гардан авч, эдгээр сурагчдын 250 гаруй нь Ерөө сумын 10 жилийн сургуулийн 9-р ангид суралцахаар хуваарилагдсан.
1972-1977 онуудад сургуулийн захирлаар Б. Дэндэв 5 жил , 1977- 1978 оны хичээлийн жилээс Ж. Баатаржав 4 жил сургуулийн захирлаар ажиллаж байсан.
1981 оны хичээлийн жилээс хөдөлмөрчдийн ерөнхий боловсролыг дээшлүүлэх зорилт тавьж анхны эчнээ 8-р ангийг 15 хүн төгсөж, 8 жилийн сургуулийн эчнээ 8-р ангийг 5 удаагийн төгсөлтөөр 63 хүн төгссөн байна.
1972-1985 онд 8 жилээр хичээллэх хугацаанд монгол хэлний багш М. Хорлоо, Л. Удвал нар өөрсдийн даасан 4б, 7А ангиудаа Ю. Гагарин, Д. Нацагдаржийн нэрэмжит бүлэг болгохоор ажиллаж №01 гэрчилгээг 5б анги №02 гэрчилгээг 8А анги гардан авч нэрэмжит бүлгийн ахлагчаар 5б ангийн сурагч Санжмятавын Болормаа, 8а ангийн сурагч Жамбалжамцын Энхтайван нар ажилласан.
Мөн дараах багш нар сурагчдыг хөгжүүлэх дугуйлан, сонгон, секц хичээллүүлж эхэлсэн нь ирээдүйн бүс, аймаг, улсын аварга сурагчдыг төрөн гарах боломжийг нээж өгсөн. Үүнд:
Дөрөв. Бүрэн дунд сургууль болон бэхэжсэн үе \ 1985 – 2008 он \
Манай сургуулийн түүхэнд ард түмний үр хүүхдийг бүрэн дунд боловсролтой болгох шинэ үе эхэлсэн бөгөөд барилгын цэргийн даамал Сүрэнжавын удирдсан барилгачин дайчдын барьсан 320 хүүхдийн суудалтай 2 давхар тоосгон тохилог шинэ сургуулиа хүлээн авч, анхны хичээлийн жил захирал Ч. Должинсүрэн \ 1981-1987 \, Ж. Гачилмаа \ 1987-1993\, М. Хорлоо \ 1993-1995\, О. Хишигбуян \ 1996-1999\, хичээлийн эрхлэгч М. Хорлоо \ 1983-1993\, Д. Бямбасүрэн \ 1993-2008 \, Г. Эрдэнэтуяа \ 1998-2003 \, Ж. Сувдаа \ 1993- 1997\ нар ажиллаж нийт 23 багш, 14 ажилчинтай, 22 бүлэгт 708 сурагчтайгаар сургалт хүмүүжлийн ажлаа явуулж ирсэн.
10 жилийн сургууль болон өргөжсөн 21 жилийн хугацаанд 10-р ангийг 21 удаагийн төгсөлтөөр 756 сурагч төгсөж бүрэн дунд боловсрол эзэмсэн. Мөн эчнээ 8-р ангийг 19 удаагийн төгсөлтөөр 150 сурагч, 10-р ангийг 11 удаагийн төгсөлтөөр 110 сурагч, албан бус боловсролоор 260 сурагч боловсрол эзэмшлээ. 10 жилийн бүтцээр ажиллаж байсан эхний 6 жилийн хугацаанд 802-839 хүүхэд суралцаж байсан нь манай сургуульд хамгийн олон хүүхэд суралцаж байсан үе байлаа.
Төгсөгчдөөс Ж. Гүнбадрал, Ж. Гүнтогтох нар БНМАУ-ын үндэсний сурын спортын мастер, Д. Жамбаа VI, VII 5-н жилийн гавшгайч, хөдөлмөрийн хүндэт медальтан, Ш. Чойжил, Д. Жамбаа, Нордогсүрэн нар улсын 1980, 1990, 1994 оны аваргууд болж, Х. Цэвээнравдан ахлагчтай волейболын баг тамирчид Монголын үндэсний олимпын “ Алтан ” медаль хүртэж, өсвөр үеийн хоккейн аварга шалгаруулах тэмцээнд сургуулийн нийт 100 гаруй хоккейчид улсын аваргын цомыг 1994, 1995,1996,1997,1998 онуудад 5 жил дараалан авч цомоо үүрд хадгалах эрхтэй болсон.
Ерөнхий боловсролын сургуулиудын болон багш нарын ажлыг шалгах шинэ журам гарч Боловсролын хэлтсээс аймгийн сургуулиудыг шалгахад манай сургууль 96 оноо авч III байрт шалгарч байсан нь бидний ажлын амжилт байлаа.
Тав. Хөгжилд түүчээлсэн Бугантын сургууль \ 2008 – 2023 он \
XXI зуун шинэ зууны анхны хичээлийн жил 21 бүлэгт 661 суралцагч, 29 багш, 8 техникийн ажилтантай Захирал Ш. Цэнгэлмаа, хичээлийн эхлэгч Д. Бямбасүрэн, бага ангийн хичээлийн эрхлэгч Г. Эрдэнэтуяа, нийгмийн ажилтан Ж. Мөнхдалай нар ажиллаж сургалт хүмүүжлийн ажлаа явуулж эхэлсэн.
Дэлхий нийтийн жишиг шаардлагад ойртуулах, боловсролын хөгжлийн чиг хандлага, шинжлэх ухаан технологийн ололтод тулгуурлан 2008-2009 оны хичээлийн жилээс 12 жилийн тогтолцоонд шилжсэн бөгөөд тус тогтолцоонд шилжүүлэхтэй холбогдуулан 6 настай хүүхдийг сургуульд элсүүлж эхэлсэн. Анхны 6 настай 36 сурагчидтай 1-р ангийг З. Батгарэл багш даан авч сургалаа. 2006-2007 оны хичээлийн жилд Анхны 11-р ангийг багш Ч. Ариунтуяа, багш Б. Оюунтуяа нарын хариуцсан 50 сурагч төгссөн бол 2018-2019 оны хичээлийн жилд Н. Эрдэнэбилэг багштай 11 сурагч 11 жилийн сургалттай сүүлчийн төгсөлт байлаа. 11 жилийн сургалтаар хичээллэсэн 8 жилийн хугацаанд нийт 13 ангийг 318 сурагч төгсч бүрэн дунд боловсрол эзэмсэн. 2014-2015 оны хичээлийн жилд анхны 12-р ангийг С. Баярбаатар багштай 21 сурагч төгссөн.
Манай хамт олны эв нэгдэл нягтарч “ Дуугарвал дуу нэг, дугтарвал хүч нэг ” уриан дор ажилч хичээнгүй хамт олон болж чадсан билээ. Хамт олны амжилтаас дурдвал:
Мөн хамт олныг үүргээр биш зорилгоор удирддаг тогтолцоонд шилжиж ажилласнаар 2007 онд сургалтын менежер Д. Бямбасүрэн аймгийн “ Тэргүүний сургалтын менежер ”, 2008 онд номын санч Д. Энхдэлгэр аймгийн “ Шилдэг номын санч ”, 2012 онд бага ангийн багш Б. Нарангэрэл аймгийн “ Шилдэг багш ”, 2015 онд дизайн технологийн багш Ү. Жаргалсайхан аймгийн “ Бүтээлч багш ”, 2015 онд математикийн багш С. Баярбаатар математикийн олимпиадын аймгийн аварга багш, бэлтгэсэн сурагч Ш. Батсүх математикийн төрөлжсөн олимпиадын аймгийн аварга сурагч, 2018 онд захирал Ш. Цэнгэлмаа аймгийн “ Шилдэг менежер ” –ээр тус тус шалгарч байсан.
Эдүгээ тус сургууль нь 21 бүлэгт 590 гаруй сурагч, 45 багш, ажилчинтай захирал П. Даваажаргал, сургалтын менежер О. Мөнхсаруул нар ажиллаж байна.
Эко сургуулийн “ Мөнгөн Гэрэгэ”, эрүүл мэндийг дэмжигч байгууллага, сумын аварга хамт олон зэрэг амжилттайгаар сургалт хүмүүжлийн ажлаа амжилттай зохион байгуулан 64 дэх хичээлийн жилтэйгээ золгож байна.
Монгол улсын боловсролын салбарыг хөгжүүлэх, жил жилийн зорилтуудыг хэрэгжүүлэх хүндтэй үүргийг хүлээн ард түмэн, мянга мянган шавь нарынхаа хүч туслалцаанд түшиглэн ирээдүйдээ итгэл төгс “ Сурлагын чанарыг сайжруулах ” зорилготойгоор Ерөө сумынхаа түүхт 100 жилийн ойгоо угтан бүтээлч олон ажлыг өрнүүлэн амжилт бүтээлээр дүүрэн байж, нийт Ерөөчүүддээ хамтын үйл ажиллагаа нь өргөжин батжиж, ажил үйлс нь амжилтаар дүүрэн байхын өлзийтэй ерөөлийг өргөн дэвшүүлье.
© 2024 он. eruu100.mn. Бүх эрх хуулиар хамгаалагдсан. Вэб хөгжүүлэгч Mind Agency